Urte osoan izaten ditugu festak antolatzeko aukerak: urtebetetzeak, lagun arteko bazkariak, urteurrenak, Gabonak…
Gaurko artikulu honetan, etxean edo lagunartean antolatzen ditugun festei buruz arituko naiz.
Hemen aurkituko dituzu aholkurik onenak zure gonbidatuek ahaztuko ez duten festa iraunkor bat egiteko.
Festa bat antolatzerakoan, kontuan hartu beharreko faktore asko izaten dira, batez ere iraunkorra izatea nahi baduzu. Goazen pausoz pauso.
Zer da festa bat eko izatea edo festa iraunkor bat antolatzea?
Ekofesta bat izateko, printzipio iraunkorrekin antolatua behar du, festan sortzen den zaborra gutxitzeko neurriak ezarriz. Festa horiek urtebetetzeak edo gai zehatz baterako izan daitezke (Gabonak adibidez), edo baita hondartzara zaborra jasotzera joatea bezalako jarduerak antolatzen direnean ere.
Zergatik da garrantzitsua gure festak era iraunkorrean antolatzea?
Festak oso ekitaldi dibertigarriak dira, baina zabor asko sortzen dute. Azken finean, jendea biltzen da, eta jan eta edan egiten dute; dekorazioa edo apaingarriak erabiltzen dira, eta ospatu egiten da. Normalean, ekitaldia amaitzean, zabortegira joaten dira erabilitako plastikozko tresnak eta errefusa orokorra.
Hala ere, festa iraunkor bat antolatzeko, ez da nahitaez lan gehiago egin behar. Gakoa aldez aurretik planifikatzea izaten da, eta zure ekintzek ingurumenean izango duten inpaktua kontuan hartuta erabaki kontzienteak hartzea. Are gehiago, errentagarriagoa ere izan daiteke, erosten dituzun gauzen kopurua murrizten baduzu. Kasu honetan, eta askotan entzun izan dugun bezala: “Gutxiagorekin gehiago izango dugu”.
Nola antolatu festa iraunkor bat ?
Lehenik eta behin, kontuan hartu zure festaren gaia zein den eta pentsatu nola egin dezakezun iraunkorragoa. Adibidez, urtebetetzea baduzu, “hondakin gutxiko” edo zero zabor opariak eska ditzakezu. Bestalde, antola ditzakezu naturan oinarritutako jarduerak edo txango dibertigarriak egiteko esperientziak.
Hauek dira jarduera horien adibide batzuk:
Kanpin festa edo mendi martxak.
Hondartza edo espazio natural baten garbiketa.
Piknik bat eta gonbidatuek janaria ekartzea.
Festa iraunkor batean, edariak eta janariak ere gogoan izan behar dira, jakina.
Horretarako, irtenbiderik onena da etxean prestatutako janaria zerbitzatzea. Gonbidatuei otordu jakin bat prestatzeko eska diezaiekezu, eta horrela denentzat izango duzu, eta lan gutxiago zuretzat. Sortzen duzun zabor kopurua murrizteko, erabilera bakarreko mahai tresnak saihestu, eta plastikoaren ordez biodegradagarriak direnak eskura ditzakezu. Beti iraunkorrena etxeko zurezko edo metalezko mahai tresnak erabiltzea izango da.
Erabakitzen duzuna erabakitzen duzula ere, izan sortzailea, eta galdetu zeure buruari nola murriztu zaborra. Festa antolatzailea bazara, ez luke oso estresagarria izan behar; aldez aurretik planifikatzea eta zure gonbidatuen lankidetza besterik ez duzu behar. Festa iraunkor bat antolatzea ez da lan gogorra; batzuetan, ohitura falta izaten da.
